*مين الى قال الدنيا دى وسية
انا اللى قلت
وباقول
واصرخ بكل القول
الدنيا دى وسية
وحتفضل وسية
لا المهدى راجع فوق حصان ابيض
ولا نور الفارس راح يطلع .. ينفض
ولا فى عيال جايه .. جديدة
تمسح دموعك يا بن الناس
هى كده
وسية
عليها كيف الوتد
حراس
وميت الف باب
وميت الف سجن
وان عشت تحلم غيرها
راح تجن
اسمع منى يا بن الناس
لا تحلم باميرة قصر
ولا هلالى فوق حصان ابيض
خلاص
معادش فى
غير سيدك
وانت عبده
طاطى يا واد ادم
طاطى
وان كان حلمك ماهوش راضى
اقتله
ادفنه
قبل مايقتلك انت
كرباج السيد فوق صدرك
وصدور الخلايق اجمعين
وان لمح بطرف عينه
عقلك
حيقول هاتوه
واد ادم ابن الندامة
ويقول شيلوه
وارموه
فى الضلام
واعقدوا محكمة الوسية
تنظر فى امر جرمه
ويا ويلك يا ابن ادم
المحكمة .. ولاد عدل صح يا خوى
محيعملوش فيك حاجة عفشة واصل
همه بس حيعملوا للسيد خاطر
ويسألوا
يا سيد
نقتله زى اللى كان قبل سابق
ولا يعيش فى جحيم السجن
وبعدين يعلنوا
بعد الاطلاع على قوانين الوسية
اللى هيه قانون واحد
واحد مفيش غيره يا ولدى
اللى يقولوا السيد .. فوق الرقاب .. نافد
ويعلنوا اعدامك و اعدام حلمك
بتهمة كبيرة وواعرة قوى
ويقولوا
اصله كان بيفكر
والاكادة لما فتشنا ضميره
لقيناه بيحلم
وتسمع الخلق كتيير بقولوا
المجرم .. واكل ناسه
كان بيحلم ؟؟؟
مع عدم الاعتذار لاستاذى سيد حجاب*
هناك 3 تعليقات:
:( لأ بقى مش وسية
؟؟؟؟؟؟
ماهي فعلا جريمة اللي يفكر و يحلم دلوقتي , و مش بعيد يطلعوا شرطة افكار تراقب الاحلام و الناس اللى بتفكر
مش بعيد ..
ساعتها ح يحاكمونا و يعلنوا اعدامنا
إرسال تعليق